14‏/6‏/2009

قـوية يا سـيـد .. !!


طالبت بتعليق الدستور ورحت رشحت نفسك ثاني يوم .. قلنا ما يخالف "سيد" ومريض الله يشافيه .. !!

شتمت نواب معاك وسميتهم "طالباني" "طائفي" .. الخ .. قلنا ما يخالف نطوفله سيد وزلة لسان اذا السيد ما طوفناله نطوف حق منو ؟؟

اقسمت انك ما راح تنزل انتخابات مرة ثانية ولعنت الي ما صوطلك وبكيت الرجال قبل النساء وفكروا انهم رايحين النار لا محالة ورديت رشحت عمرك .. قلنا عادي يحقله سيد ويشّور ويسوي الي يبي !!

تشهد بإن قناة سكوب قناة وطنية وتدعو الى الوحده الوطنية .. قلنا هم ما يخالف في تحدي بين السيد والجويهل منو اكثر واحد يطلع بهالقناة وحب يجامل ..!!

استجواب البراك "قبلي" .. !! تكفى سيد شكو قبلي بالأستجواب ولا اهي بس الكلمة الوحيدة الي ما زل فيها لسانك ؟؟ بس هم بنطوفها لك خو سيد خو !!

بس تقول يا سيد بأن وزير الداخلية الحالي "افضل وزير داخلية مر على الوزارة" !! .. طوفتلك وايد يا سيد ورقعلتك بما فيه الكفاية بس هذي اسمحلي قوية يا سيد :) ما توقعتك حكومي لهذه الدرجه ترى كل الي سوتلك الحكومة رجلة علاج خمس نجوم هذا الي نعرفه ..!! يا اخي صرت تنافس "ناصر الدويلة" الله يذكره بالخير .. !!

هناك 11 تعليقًا:

Q80 Blogger يقول...

اهو بس على احسن وزير !!!

ماكو كلمه غبيه ماقالها بهالمقابله


ولا سلوى الجسار الي ماتدري وين الله قاطها

اشفيهم الحريم ذابحين نفسهم على الحكومه !! هالكثر مو مصدقين انهم داشين المجلس !

الحوري يقول...

لا يغرك الطير بصفت الريش ....
هذي واجهه ... فترينا ...
وكل ينفخ على قرصه ...
وجان هذي البحريه ( طبعنا ) وانا اخوك

Mohammad Al-Yousifi يقول...

مع احترامي لك بس كلام السيد صح

وزير الداخلية الحالي أفضل وزير مسك هالوزارة

لأن اللي قبله كلهم أسوأ

فساد الداخلية ما تشيله الأيربص اليديدة اللي فيها شاورات

Blog 3amty يقول...

ماكو فايدة الشعب ينسى ..

enter-q8 يقول...

مشكلة للحين محد قادر يسد مكان الدويلة و التنافس قوي صج صج مشكله

bo bader يقول...

عفية عليه ال Payroll
متروس أسامي وسخة !!

بو سعد يقول...

اي والله جان هذي البحريه .. لا بالله ( طبعنا )

أبــو بنــــدر يقول...

مساك الله بالخير

سبحـان من جمـع القلاف والوطن على قلب واحـد القلاف محامي الحكومة بعد الجهبذ ناصــر الدويلة أصبح متخصص في الدفاع عن وزيـر الداخلية وفتش عن السبب ؟ بدل مســائلة وزير الداخلية على اعتقال مواطنيـن منهم زملاء له بسبب آرائهـم نجـد القـلاف يستميت دفاعا عن وزير الداخلـية ويبرر له وأعتقد لو صعد الوزير للـمنصة لن يدافع عن نفسه مثـل القلاف !! عيب فعلا يالقلاف تحويـر هدف الاستجواب لاسباب في نفسك واطلاق صفة كاذبة تعلم أنت قبل غيرك أنها غيـر صحيحة فهل عجزت الحكومة عن التبريـر لوزيرها لتطلق القلاف على الاستجـواب ام هو تبرع منـه؟

والسلام ختام يا بو فهد

جبريت يقول...

الظاهر يبي يقعد له ببرج العرب اسبوع فوق رحلة العلاج الي ما خلصت وعليها شاليه بأسبانيا مقابل سواحل المغربيه بس الله العالم انه يبي ياخذ مكان دميثير هالسنه من بعد ما صار معارضه

فريج سعود يقول...

معليش عديهالو المره دي








كمان

جبل واره يقول...

Q80
السيد خرّف ولا المرض مأثر عليه الله يشفيه ..
سلوى الجسار احسها بكل بساطه "ضايعه" .. !!

المتفائل
تعديلاً على البيت "الطير لا يغريك بصفة الريش" .. اتفق معاك جداً في الامثله الحكيمه .. :\

مطقوق
احترم رايك .. بس ما تشوف معاي ان فساد الداخلية زاد بعصر الوزير الحالي لدرجه كل يوم نلقى ضابط بياع خمر ولا راعي مخدرات ولا اختلاسات ولا اصحاب تكاسي ... الخ ؟؟

بلوق عمتي
مشكلتنا طيبيين او بمعنى ادق عاطفيين :\

ابو وليد
يبقى الدويلة رمز .. طبعاً رمز حكومي والفال للسيد :)

بو بدر
عشانك انا احترم الديتول

بو سعد
الله يستر :\

بو بندر
اتمنى ان يصعد الوزير المنصه ونشوف خطبة القلاف المعارضه للإستجواب طبعاً بس اتمنى ان ما "يلعن" النواب ويوديهم النار .. !!

عنيف
تبديل مراكز على قولتك مع دميثير المنكوب من الحكومة :)

فريج سعود
راح نعديها .. والقادم "اكبر" وهم راح نعديه لأنه سيّد وينخاف منه بصراحه .. !!