قبل يومين تسائل رئيس الدولة على شنو الخلاف في الكويت؟
ولا واحد نايم بالشارع.
-صحيح محد نايم بالشارع لان اغلب الشعب اما ساكنين اجار او ساكنين عند أهاليهم مو من شطارة الحكومة.
ويقول رئيس الدولة ما عندنا احد جائع.
-عدل لكن عندنا شعب تعود عالأكل الفاسد أطنان من الاكل الفاسد بدون لا نشوف ولا تاجر تحاسب وصلنا لمرحلة اذا أكلنا اكل نظيف بطنا يعورنا تعودنا عالأكل الفاسد.
ويقول رئيس الدولة ما عندنا احد لجأ لبلد ثاني.
-في .. في كويتيين إلجأوا لبلد ثاني وفي بدون نحاشوا من الظلم الواقع عليهم وعاشوا في بلدان ثانية احترمتهم وعطتهم جناسي وفي موضوع اخطر ان نسبة الشباب المستعدين للهجرة كبير ولكن ينتظرون فرصة.
ويمدح رئيس الدولة المستشفيات الموجودة في الكويت.
-اخر مستشفى بني في الكويت كان في الثمانينات يعني اكثر من ٢٥ سنة لم يتم افتتاح اي مستشفى وطبعا غير مواضيع ان ماكو أسره للمرضى وان التشخيص غلط وان المواعيد بعيده وان الشيوخ كلهم يعالجون بره لأنهم عارفين مستوى الصحة عندنا.
ويقول رئيس الدولة ان الله أغنانا بالنفط.
-هذي نعمة يتمتع ويستمتع فيها الدول الصديقة والشقيقة هم مستفيدين منها ونشوف فلوس النفط تروح لهم اما في الكويت فنسمع عن مليارات تتوزع يمين ويسار وما نشوف هالفلوس على ارض الواقع لا في بنية تحتية ولا في تحقيق اي من عوامل الرفاهية الي زاد للأمانة شي واحد فقط هو مبالغ الرشاوي قبل كنا نسمع فلان قبض ٥٠ الف وفلان قبض ٢٠٠ الف الحين صرنا نسمع ان فلان قبض مزرعة وفلان قبض ٨ مليون.
ويشتكي رئيس الدولة من لغة الحوار.
-الي اذكره ان أقذر ناس بالكلام من طقه اجويهل الي حولهم ويحتويهم ويدعمهم ابناء الاسرة وان أقذر كلام ينشر في الصحف من صحف يملكها ابناء الاسرة وتذكرون هوشه الشاهد والوطن.
ويستنكر ويستغرب رئيس الدولة الكلام عن وجود تعاملات مليارية مع اسرائيل.
-من قال هالكلام هو ولد اخوك احمد فهد الاحمد الصباح وأتهم ولد اخوك الثاني ناصر المحمد الاحمد الصباح والموضوع عند النيابة من شهور.
ويختصر رئيس الدولة أزمة الكويت الحالية انها بسبب مرسوم الصوت الواحد.
-منو الي دخلنا بهذي الأزمة؟
وليش صارت هذي الأزمة؟
ومنو مستفيد من هذي الأزمة؟
طيب ليش تعطونهم فرصة لعمل هالازمة؟
-في شي عندنا ماشي عدل من الأساس؟ كل شي ماشي غلط والي ماكلها المواطن خلف الله عليه.