كنت في اجازة الاسبوع الماضي وقرتت قضائها في مخيمي المتواضع في شمال البلاد لا أحد معي سوى "الصبي" مراد , وفي صباح يوم جميل بارد جلست في خيمتي احتسي كوباً من الكابتشينو واكل الكروسان (قوية صح) مرتاح البال صافي الذهن مبتعداً عن قلق العالم وصخب المدينة وغثاء الصحف "تحلّطم" المدونات وصراع الحضارات وتذمر الدواوين وحوّل سوق الأسهم وازعاج الاطفال وزحمة الشوارع والاحتباس الحراري !! فتحت الهاتف الخلوي المغلق (عجبتي الخلوي ) واذا بسيل من المسجات التي سبب لي حوّل مؤقت لمدة خمس دقائق , وبعد ان هدأ ازيز التلفون فتحت الرسائل اذا اغلبها عبارة عن "miss U" ورسائل تطالبني بالاتصال فوراً من اصدقاء الكفاح النتي ابو عبدالله وابو حامد , قلت في قرارة نفسي "بس واحد فيهم جاب العيد وكتب شيء مش ولابد" اتصلت سريعاً على ابو عبدالله
ابو فهد : صبحك الله بالخير بو عبدالله
بو عبدالله : انت وينك ؟؟
صوت بو حامد بجانبه "شكو مطفي تلفونك"
بوفهد : صبحني الله بالنور !! والله يا خوك انا بالمخيم وتوني قاعد من النوم
بوعبدالله : خلاص الحيين يايينك
بوفهد : حياكم الله هذي الساعة المبار
بوعبدالله : طوط .. طوط
بو فهد : هذيل شفيهم
ارتسمت علامات الدهشه على مقلتي !! فمابال ابو عبدالله "متصروّع" ؟؟ وما هي الا ساعة زمن واذا بهم يصلون الى المخيم واخرج لهم مرحباً بقدومهم بوجهٍ بشوش كعادتي وسن ضاحكاً ( لزوم التلميع كيفي انا الكاتب) واذا بي ارى ملامحهم عابسه حزينه مستغربه مستنكره ليست تلك الوجيه التي آلفتها دوماً , بعد السلام جلسنا في الخيمه ودار بيننا هذا الحديث
بوحامد : ماتدري شنو صاير بالديرة ؟؟
بوفهد : انا منحاش عن الديرة علشان مابي اعرف شنو صاير , ولا ودي اعرف بصراحه
بوحامد : الحكومة تبي تراقب المواقع والمدونات وتسن قوانين تجرمها
بوفهد : شنو !! من صجك انت ؟؟
بوحامد : اي والله لا وبعد يبون يشكلون فرقة بس علشان يلاحقون المدونين
بوفهد : شدعوة المدونين لهدرجه مخربينها ؟؟ اهو صج ان بعضهم يستخدم الحرية والديموقراطيه بشكل غلط وتتكلم حسب توجهاتها وميولها وجزء بسيط يتكلم بوازع مرضي داخلي بس الاغلبيه قلبها على الديرة وتكتب بحس الوطنية
بوعبدالله : يا معودين الحين شنو نسوي
وبعد دقيقتين صمت للتفكير ..
بوفهد : بس خلاص عندي الحل
بوحامد : على ايدك يا معوّد
بوفهد : نبيع المدونة ونفتح محل دواجن ونشتري فقاسات بيض ونبيع البيض للمواطنين طالما ان البيض مختفي من الجمعيات واسعاره مرتفعه
بوعبدالله يرمق لي بنظرة "مش ولابد" ويقول : مو وقت غشمرة
بوحامد : يعني راح يكممون افواه المدونين !! ويحبسون الحريات ؟؟
بوعبدالله : بس المدونين وغيرهم مواطنين ويحقلهم يقولون رايهم بكل حرية واحنا في بلد ديموقراطي والدستور يكفل للإفراد حرية التعبير
بوفهد : معاك حق يابو عبدالله ولو اني ماني مقتنع ان الحكومة بتترك شغلها ومهاماتها وتقعد تلاحق المدونين
بوحامد : لو يفرون جهودهم في تطوير التنمية والبنية التحتية التالفه في الكويت الى من السبعينيات ما تطورت
بوعبدالله : لو يوفرون جهودهم في تطوير محطات الكهرباء وبناء محطات جديده بدال حملات الترشيد اللي تفشل وتضيق الخلق
بوفهد : لو يوفرون جهودهم في محاربة جشع التجار اللي نهبو الديرة ورفعو اسعار كل شي من اراضي وعقارات ومواد استهلاكيه وصار المواطنين جنهم لاجئين في ديرتهم
بوحامد : لو يوفرون جهودهم للتفكير الجدي في جعل الديرة مركز مالي واقتصادي والحجي الي شبعنا منه وما شفنا منه شي الى الأن
بوعبدالله : لو يوفرون جهودهم لحل مشكلة البدون اللي كل مالها تزيد وتكبر وصار تأثر على تركيبة المجتمع ليش ما تجنس اللي يستحق منهم خو قوقه ودرويش و كومار وحسني والطباخ اليمني مو ابرك منهم واللي ما يستحق منهم يا يعدل وضعه ولا يتوكل ديرته
بوفهد : لو يوفرون جهودهم لتطوير التعليم وجلب كوادر تربويه صحيحة بدال "الستوكات" اللي موجوده الحين صاروا اطفالنا شكبر الواحد ما يعرف 2 ضرب 2 جم
بوحامد : لو يوفرون جهودهم لملاحقة مغتصبي المال العام والصفقات المشبوهه اللي تنهب خير هالديرة
بوعبدالله : لو يوفرون جهودهم للأستفادة من العائدات المالية الكبيرة التي اتت وستأتي من ارتفاع اسعار النفطي والتفكير في استثمارها بشكل جيد وممتاز يفيد مستقبل البلد ويوفر الأمن للأجيال القادمة وايجاد مصدر دخل ثاني غير النفط دائم ومتجدد
بوفهد : لو يوفرون جهودهم لتطوير المستشفيات اللي اكل عليها الدهر وشرب وتوفير كادر طبي "ادمي" بدال الي اييون يتدربون على المواطنين وينسون مقصات وشاشات العملية داخل بطون المرضى
بوحامد : لو يوفرون جهودهم بمحاربة نواب الابتزاز والمتنفعين السياسيين لمصالحهم الشخصية عبر تشكيل حكومة قويه ووضع سياسه اقوى وترتيب الوزارات وتنظيفها من الفساد وتقول لا لكل نائب مبتز او متكسب
بوعبدالله : لو يوفرون جهودهم بتفعيل وتأهيل وتطوير دور الموظف وجعله موظف منتج بدلاً من كونه بطاله مقنعه يقعد ورى المكتب ويقرا جرايد
بوفهد : لو يوفرون جهودهم لتطوير الرياضة اللي صارت بالحضيض لا ملاعب نفس الناس لا صراعات تكتل ومعايير والرياضه بالنازل والشعب محترقه اعصابه حتى الاستاد الي ناطرينه سنين للحين اعتقد لو نبي نبني مدينة رياضيه يبيلنا 100 سنه
بوحامد : لو يوفرون جهودهم ويحلون مشكلة الاسكان وارتفاع الاجارات المواطن يقعد 15 سنه اقل شي علشان يطلعلعه بيت واذا طلعله بيت حاذفينه بالمطلاع ولا الصبيه لا الخيران
لو يوفرون جهودهم .. لو يوفرون جهودهم .. لو يوفرون جهودهم .. لو يوفرون جهودهم .. ظل الحديث مستمراً الى اكثر من 3 ساعات متواصله وكان الحديث ذو شجون وكان "التحلطم" والتذمر والتشاؤم هو الجو السائد في الجلسة وتم استهلاك 3 رؤوس نوويه عفواً اقصد 3 رؤوس "سلوم" وباكتين سقاير و20 استكانه شاي الربيع اكسبرس .. الى ان اتى مراد وقطع الحديث وقال : لو يوفرون جهودهم بابا غداء خلاص
تمت
.
.
.
.
.
هذه القصه خياليه كتبت في الموزنبيق من قبل مواطن موزنبيقي والشخصيات التي في القصة موزنبيقيية تم ذكرهم بعد اخذ موافقتهم الخطية والموافقه مصدقه من قبل الحكومة الموزنبيقية والمخيم موزنبيقي ايضاً !! والقصة ولا تمت للكويت بصله من قريب ولا من بعيد ونحن في مدونة جبل واره سابقاً مصنع "تفقيس البيض" حالياً نحب الحكومة ونحب كل وزير وكل مدير وكل رئيس قسم وكل موظف وكل بدون وكل وافد وكل بنغالي !! والخواطر والاشعار التي اكتبها بين فترة واخرى سوف تتغير من الأن وصاعداً وتصبح "مطبّلة" للحكومة بشكل علني , هذا وسوف يتم مسح اي رد معارض للحكومة او يمس احد من الوزارء اوالمدراءا ورؤساء الاقسام ....الخ تعرفون باجي القائمة ما يحتاج اعيدها , ومن الآن وصاعداً سوف اكتب اشعار واغاني حكومية وهناك احتمال ان نكوّن فرقة شعبيه حكومية سوف نطلق عليها الثلاثي الموزينبقاني وسوف تكون باكورة اغانينا عربون صداقة الى الحكومة الموقره على الحان مطربنا القومي شعبان عبدالرحيم ..
بحب كل الحكومه
ووزاءنا اقدع ناس
مافيش حاقه مذمومه
ومافيش وضع محتاس
ايييييييييييييييييييييييييييييي .... !!
مجلس الامه معطل
شغل البلد يا هـوّه
مش عارف امتى يبطل
ان شاءالله يسرحوه
ايييييييييييييييييييييييييييييي .... !!