7‏/2‏/2008

!! قــصــة مــوزنــبــيــقــيــة

كنت في اجازة الاسبوع الماضي وقرتت قضائها في مخيمي المتواضع في شمال البلاد لا أحد معي سوى "الصبي" مراد , وفي صباح يوم جميل بارد جلست في خيمتي احتسي كوباً من الكابتشينو واكل الكروسان (قوية صح) مرتاح البال صافي الذهن مبتعداً عن قلق العالم وصخب المدينة وغثاء الصحف "تحلّطم" المدونات وصراع الحضارات وتذمر الدواوين وحوّل سوق الأسهم وازعاج الاطفال وزحمة الشوارع والاحتباس الحراري !! فتحت الهاتف الخلوي المغلق (عجبتي الخلوي ) واذا بسيل من المسجات التي سبب لي حوّل مؤقت لمدة خمس دقائق , وبعد ان هدأ ازيز التلفون فتحت الرسائل اذا اغلبها عبارة عن "miss U" ورسائل تطالبني بالاتصال فوراً من اصدقاء الكفاح النتي ابو عبدالله وابو حامد , قلت في قرارة نفسي "بس واحد فيهم جاب العيد وكتب شيء مش ولابد" اتصلت سريعاً على ابو عبدالله


ابو فهد : صبحك الله بالخير بو عبدالله
بو عبدالله : انت وينك ؟؟
صوت بو حامد بجانبه "شكو مطفي تلفونك"
بوفهد : صبحني الله بالنور !! والله يا خوك انا بالمخيم وتوني قاعد من النوم
بوعبدالله : خلاص الحيين يايينك
بوفهد : حياكم الله هذي الساعة المبار
بوعبدالله : طوط .. طوط
بو فهد : هذيل شفيهم


ارتسمت علامات الدهشه على مقلتي !! فمابال ابو عبدالله "متصروّع" ؟؟ وما هي الا ساعة زمن واذا بهم يصلون الى المخيم واخرج لهم مرحباً بقدومهم بوجهٍ بشوش كعادتي وسن ضاحكاً ( لزوم التلميع كيفي انا الكاتب) واذا بي ارى ملامحهم عابسه حزينه مستغربه مستنكره ليست تلك الوجيه التي آلفتها دوماً , بعد السلام جلسنا في الخيمه ودار بيننا هذا الحديث

بوحامد : ماتدري شنو صاير بالديرة ؟؟
بوفهد : انا منحاش عن الديرة علشان مابي اعرف شنو صاير , ولا ودي اعرف بصراحه
بوحامد : الحكومة تبي تراقب المواقع والمدونات وتسن قوانين تجرمها
بوفهد : شنو !! من صجك انت ؟؟
بوحامد : اي والله لا وبعد يبون يشكلون فرقة بس علشان يلاحقون المدونين
بوفهد : شدعوة المدونين لهدرجه مخربينها ؟؟ اهو صج ان بعضهم يستخدم الحرية والديموقراطيه بشكل غلط وتتكلم حسب توجهاتها وميولها وجزء بسيط يتكلم بوازع مرضي داخلي بس الاغلبيه قلبها على الديرة وتكتب بحس الوطنية
بوعبدالله : يا معودين الحين شنو نسوي

وبعد دقيقتين صمت للتفكير ..

بوفهد : بس خلاص عندي الحل
بوحامد : على ايدك يا معوّد
بوفهد : نبيع المدونة ونفتح محل دواجن ونشتري فقاسات بيض ونبيع البيض للمواطنين طالما ان البيض مختفي من الجمعيات واسعاره مرتفعه
بوعبدالله يرمق لي بنظرة "مش ولابد" ويقول : مو وقت غشمرة
بوحامد : يعني راح يكممون افواه المدونين !! ويحبسون الحريات ؟؟
بوعبدالله : بس المدونين وغيرهم مواطنين ويحقلهم يقولون رايهم بكل حرية واحنا في بلد ديموقراطي والدستور يكفل للإفراد حرية التعبير
بوفهد : معاك حق يابو عبدالله ولو اني ماني مقتنع ان الحكومة بتترك شغلها ومهاماتها وتقعد تلاحق المدونين
بوحامد : لو يفرون جهودهم في تطوير التنمية والبنية التحتية التالفه في الكويت الى من السبعينيات ما تطورت
بوعبدالله : لو يوفرون جهودهم في تطوير محطات الكهرباء وبناء محطات جديده بدال حملات الترشيد اللي تفشل وتضيق الخلق
بوفهد : لو يوفرون جهودهم في محاربة جشع التجار اللي نهبو الديرة ورفعو اسعار كل شي من اراضي وعقارات ومواد استهلاكيه وصار المواطنين جنهم لاجئين في ديرتهم
بوحامد : لو يوفرون جهودهم للتفكير الجدي في جعل الديرة مركز مالي واقتصادي والحجي الي شبعنا منه وما شفنا منه شي الى الأن
بوعبدالله : لو يوفرون جهودهم لحل مشكلة البدون اللي كل مالها تزيد وتكبر وصار تأثر على تركيبة المجتمع ليش ما تجنس اللي يستحق منهم خو قوقه ودرويش و كومار وحسني والطباخ اليمني مو ابرك منهم واللي ما يستحق منهم يا يعدل وضعه ولا يتوكل ديرته
بوفهد : لو يوفرون جهودهم لتطوير التعليم وجلب كوادر تربويه صحيحة بدال "الستوكات" اللي موجوده الحين صاروا اطفالنا شكبر الواحد ما يعرف 2 ضرب 2 جم
بوحامد : لو يوفرون جهودهم لملاحقة مغتصبي المال العام والصفقات المشبوهه اللي تنهب خير هالديرة
بوعبدالله : لو يوفرون جهودهم للأستفادة من العائدات المالية الكبيرة التي اتت وستأتي من ارتفاع اسعار النفطي والتفكير في استثمارها بشكل جيد وممتاز يفيد مستقبل البلد ويوفر الأمن للأجيال القادمة وايجاد مصدر دخل ثاني غير النفط دائم ومتجدد
بوفهد : لو يوفرون جهودهم لتطوير المستشفيات اللي اكل عليها الدهر وشرب وتوفير كادر طبي "ادمي" بدال الي اييون يتدربون على المواطنين وينسون مقصات وشاشات العملية داخل بطون المرضى
بوحامد : لو يوفرون جهودهم بمحاربة نواب الابتزاز والمتنفعين السياسيين لمصالحهم الشخصية عبر تشكيل حكومة قويه ووضع سياسه اقوى وترتيب الوزارات وتنظيفها من الفساد وتقول لا لكل نائب مبتز او متكسب
بوعبدالله : لو يوفرون جهودهم بتفعيل وتأهيل وتطوير دور الموظف وجعله موظف منتج بدلاً من كونه بطاله مقنعه يقعد ورى المكتب ويقرا جرايد
بوفهد : لو يوفرون جهودهم لتطوير الرياضة اللي صارت بالحضيض لا ملاعب نفس الناس لا صراعات تكتل ومعايير والرياضه بالنازل والشعب محترقه اعصابه حتى الاستاد الي ناطرينه سنين للحين اعتقد لو نبي نبني مدينة رياضيه يبيلنا 100 سنه
بوحامد : لو يوفرون جهودهم ويحلون مشكلة الاسكان وارتفاع الاجارات المواطن يقعد 15 سنه اقل شي علشان يطلعلعه بيت واذا طلعله بيت حاذفينه بالمطلاع ولا الصبيه لا الخيران


لو يوفرون جهودهم .. لو يوفرون جهودهم .. لو يوفرون جهودهم .. لو يوفرون جهودهم .. ظل الحديث مستمراً الى اكثر من 3 ساعات متواصله وكان الحديث ذو شجون وكان "التحلطم" والتذمر والتشاؤم هو الجو السائد في الجلسة وتم استهلاك 3 رؤوس نوويه عفواً اقصد 3 رؤوس "سلوم" وباكتين سقاير و20 استكانه شاي الربيع اكسبرس .. الى ان اتى مراد وقطع الحديث وقال : لو يوفرون جهودهم بابا غداء خلاص



تمت


.
.
.
.
.

هذه القصه خياليه كتبت في الموزنبيق من قبل مواطن موزنبيقي والشخصيات التي في القصة موزنبيقيية تم ذكرهم بعد اخذ موافقتهم الخطية والموافقه مصدقه من قبل الحكومة الموزنبيقية والمخيم موزنبيقي ايضاً !! والقصة ولا تمت للكويت بصله من قريب ولا من بعيد ونحن في مدونة جبل واره سابقاً مصنع "تفقيس البيض" حالياً نحب الحكومة ونحب كل وزير وكل مدير وكل رئيس قسم وكل موظف وكل بدون وكل وافد وكل بنغالي !! والخواطر والاشعار التي اكتبها بين فترة واخرى سوف تتغير من الأن وصاعداً وتصبح "مطبّلة" للحكومة بشكل علني , هذا وسوف يتم مسح اي رد معارض للحكومة او يمس احد من الوزارء اوالمدراءا ورؤساء الاقسام ....الخ تعرفون باجي القائمة ما يحتاج اعيدها , ومن الآن وصاعداً سوف اكتب اشعار واغاني حكومية وهناك احتمال ان نكوّن فرقة شعبيه حكومية سوف نطلق عليها الثلاثي الموزينبقاني وسوف تكون باكورة اغانينا عربون صداقة الى الحكومة الموقره على الحان مطربنا القومي شعبان عبدالرحيم ..
بحب كل الحكومه
ووزاءنا اقدع ناس
مافيش حاقه مذمومه
ومافيش وضع محتاس
ايييييييييييييييييييييييييييييي .... !!
مجلس الامه معطل
شغل البلد يا هـوّه
مش عارف امتى يبطل
ان شاءالله يسرحوه
ايييييييييييييييييييييييييييييي .... !!

هناك 14 تعليقًا:

Q80 Blogger يقول...

خلهم يراقبون
وايد صايرين مهمين احنا .. شغل عدل
باجر ينقط واحد بالحبس .. يصير اسطوووره بالوطنيه
بس عاد لازم له توجه واضح

فاخذو احتياطاتكم من الحين .. ودورولكم تكتل

kila ma6goog يقول...

ليش ما تعزمنا على موزنبيق؟

و بالنسبة لو يوفرون جهودهم لحل باجي المشاكل

أعتقد ان باجي المشاكل أصبحت من المسلّمات بالنسبة لهم , و لذلك علينا ان نعلمهم ان المدونات و اهل المدونات أيضا أصبحوا مسلّمات و ما فيه خيار غير التعامل معهم على هالأساس

و الدور على الحكومة انها تثبت لنا انها من المسلّمات عشان ما نسوي فيها مثل ما سوينا قبل سنتين

شكرا ,

طبعا الكلام كله عن موزنبيق

:)

حياتي هدف مو عبث يقول...

ههههه أضحك الله سنك أخووي :>

حياتي هدف مو عبث يقول...

بوحامد : لو يفرون جهودهم في تطوير التنمية والبنية التحتية التالفه في الكويت الى من السبعينيات ما تطورت

....

يفرون ؟؟ ولا يوفرون ؟؟

كلمة الحق تسبق :)

شريف روما يقول...

خل يورفون جهودهم لمراقبتنا
واحنا بنوفر جهودنا لانتقادهم

Sn3a يقول...

البوست ابداع
اخرها اطيبها
واييييه

بو فهد يقول...

q8i
العمل الوطني اصدقاء الحكومة , وحدس اكثر ناس مستفيدة من الحكومة وشغلهم ماشي!!
يعني يا العمل الوطني يا عدس باشا بس الله العالم اننا راح ننضم الى الجبهة الشعبية الموزنبيقيه الثورية !!



مطقوق
قدم طلب لجوء مدوناتي الى العاهل الموزنبيقي وراح يتم توجيه دعوة رسمية لسعادتكم :)
اما في خصوص ان المدونات تعتبر من المسلمات يا اخي الدستور يقول ان حرية التعبير والرأي مكفولة شلون تبي تحجم هذي الحرية !! مادش بمخ اغبى ولد موزنبيقي !!


حياتي هدف
وسنك اخي الكريم .. يعني واضح ان الموضوع مكتوب الفجر لا تدقق :)



شريف روما
ما اعتقد ان الكتّاب الشرفاء والوطنين راح يتأثرون من اللي بيصير هذا اذا ماكان لهم دافع للمزيد وانا اثق بهالشيء ..


سنعه
مشكوره عزيزتي واييييييييييييييييييييييييي :)

bo bader يقول...

أعيد نشر تعليقي اللي كتبته في مدونة فريج سعود
----------

تبي الصج يا الحبيب ...

إحنا مثل اللي قاعدين في مسرح العرائس ، اللي نشوف مجرد ممثلين والشخصيات الحقيقية تحرك هذي العرائس يمين ويسار !!

مستحيل أصدق أن المحيلبي مع احترامي الشديد لشخصه ، هو اللي يفكر ويقرر ويقترح مثل هذه القوانين !!

صعبة وايد على خريج قسم الجغرافيا بجامعة الكويت !!

Talk about qualified people!!

المهم الحين ان نعرف شنو هدف من وراء هذه العرائس من هذا الكلام الخطير ؟

جس نبض الشارع الكويتي !!
تخويف الناس عن الكلام عن الفساد !!
والأخطر أن يكون تهويشة وابعاد الأنظار عن شغلة وايد أكبر ووايد أخطر !!

تحياتي لك جارنا العزيز ...

هذيان يقول...

والحسابه بتحسب
والساعة بخمسة جنيهة

واللهم لا نسالك رد القضاء ولكن نسألك اللطف فيه

وبص شوف الحكومة بتعمل أيه


بابا مراقبة المدونات أسهل من مطالبكم
ما عندكم حل وسط

والسلام عليكم

حياتي هدف مو عبث يقول...

أخيتك .. مش أخووك .. :)

هـــدب يقول...

بيان من الرئاسه
تري
المخيم الموزنبيقي لاحقته بعد الرقابه
عيل يالا شدواحيلكم وورونافرقتكم الشعبيه الثلاثي الموزينبقاني وسمعونا اغانيكم بحرية بعيد عن الرقابة
وبجذيه خلصت اللي علي
تحياتي للفرقه

Fahad Al Askr يقول...

يعني رحت المخيم وما عزمت

فتى الجبل يقول...

شكلي بروح موزمبيق

بو فهد يقول...

بو بدر

اتفق وياك ان المحيلبي "مع احترامي له" صعبه يكون وراء هذا القانون !! وصعبه اقتنع انها من ابداعاته :/

اعتقد انها "جس نبض" لشيء اكبر أأت والله اعلم !!



هذيان
عزيزتي نحن قوم لا نعرف "الوسط" الا في القهوه فقط !!



حياتي هدف مو عبث
اخيتي ولا تزعلين :|


هدب
احنا ناقصين يا ربي !! يعني الواحد ماخذ قشه ومهاجر الى البراري وهم يتراقب !! اتوقع مكان واحد مو مراقب بس !! القبر :S


فهد العسكر
يعني بصراحه اشعارك وقصائدك بروحها "تهمه" تمشي على الارض !! وبعد مراقبة المدونات قد يتم جرجرتك لمجرد انك تحمل اسم فهد العسكر !! بعد هذا تتوقع اعزمك على المخيم ؟؟
ياخوفي نعزمك على "طلحه" !!


فتى الجبل
حياك اخوي وترى مو محتاجين فيزا ولا كرت زيارة ولا كفيل ولا شي بس اللهم تقول "بالروح بالدم نفديك يا موزنبيق" وعلى طول يعطونك اللجوء السياسي الانترنتي !!