25‏/2‏/2010

على الطاير للـ "الساير" .. !!

بمناسبة الموضوع الي شغل العالم في الفترة الاخيرة الا وهو "تويوتا" وتقديم رئيسها للأعتذار عن العيوب المصنعية الاخيرة الي اكدها في اجتماعه مع الكونغرس الامريكي وان الشركة اخطأت وركزت على الكمية بدلاً من الجودة .. !! وهذه الشجاعة مستحيل ان يتطرق لها وكيل تويوتا بالكويت "الساير" صاحب البرج العاجي الي رد على الاتهامات والشكاوي ببيان صحفي غريب مختصره ( لا يوجود اي اخطاء مصنعية ولكن لأرضاء العميل سوف نستدبل القطع ) .. !! خير ان شاءالله مصدقك ..
.
هذا مقطع يوتيوب الي سبب ضجة بأمريكا اتصال بالطوارىء بعد ما فقدوا السيطرة على السيارة وماتو كل العائلة .. وخلا الكونغرس يستدعي مدير تويوتا ويحقق معاه ويجبرها على سحب سياراتها واصلاح الاخطاء .. !! وصاحبنا يقول لأرضاء العميل راح نبدل القطعه ومافيها شي .. !!
.
الكل يعرف ان اقل موصفات تويوتا عندنا بالكويت وفي فرق كبير بين مواصفات الساير ووكالات الخليج الثانية , لأن صاحبنا "الجعص" يجيبهم بأقل المواصفات ويركب لهم شاشات وسنسرات والاكسسوارات في محلات احسان ( اضغط هنا ) الي بشرق ويبيعهم علينا بأنه كامل المواصفات .
.
الاسعار نار وفرق السعر بينا وبين باقي دول الخليج يوصل الى مبلغ محترم , ولما الناس بدت تجيب السيارات من السعوديه ودبي وقطر راح الساير ومنع استيراد تويوتا من غير وجه حق تم نسف القرار بحكم من المحكمه بعد ان رفع المواطنين قضيه على الساير وكسبوها , ولما يأس من منع الاستيراد راح ينتقم من الي يجلبون سيارات من بره وارخص واحسن مواصفات من سياراته بأسقاط الكفالة من على السياراة المستوردة .. !!
.
على فكرة .. الفطيم وكيل تويوتا ولكزس بالامارات استدعى اصحاب السيارات عن طريق رسائل نصية SMS لصيانة .. وصاحبنا يقول مافيها شي وراح نبدلها لأرضاء العميل .. !!
.
قال من أمرك .. قال من نهاني .. !!
.

هناك 11 تعليقًا:

بو حامد يقول...

دايما ظالمين الناس

يا اخي تأكد يمكن بس الساير الوكيل الوحيد بالعالم الي ما عندهم اي خطأ مصنعي بسياراتهم

بو فهد يقول...

اصلاً من قالك ان الساير وكيل .. !!

الساير ياعزيزي مصنع واهو الي يصدر لليابان .. !! واسأل "احسان" .. !!

غير معرف يقول...

حسب ما سمعت
الساير ليس وكيل تويوتا

الساير موزع فقط , الوكيل الاصلي هو الموجود في السعودية , هو وكيل تويوتا في الشرق الأوسط كله و الساير موزع في الكويت من قبل الوكيل الاصلي فقط لاغير

reemas يقول...

المشكله ان شركة تويوتا ساكته عنه و معطيته الخيط و المخيط.
مو بس حكومتنا.
انا حاولت مره ادز ايميل لشركج تويوتا اشتكي فيها علي الساير. طلع موقعهم يستقبل بس اللي امريكا. و ردوا علي قالولي دز ايميل على حسب منطقتك. و لما دورت لقيت رابط الكويت يوديك لموقع الساير. يعني لازم اشتكي عليه عنده.
شركات ثانيه لها مراكز اقليميه و ممكن تشتكي عليهم و يتبهدل.
الا هذا.. عشان جذي يسوي اللي يبيه و مو هامه احد.
حسبي الله و نعم الوكيل.
و انا كتبت عن الموضوع قبل لا ينزل بيانه.

أبو الدســتور يقول...

ياخي تبي الصج

الشـــرها على التجارة اللي نايمين بالعسل

ولا ليش مايستدعونهم ويحققون معاهم ويعلنون نتائج التحقيق على الناس
ومن ثم الزامهم بالحلول لتفادي المشاكل

enshallah 5air يقول...

في مثل يقولونه اجدادنا...

من آمن العقوبة أساء الأدب

نعم... هذا بالضبط إللي حاصل في البلد

مَـــــعْــــمَــــعَـــــه يقول...

الديره يا يبا ديرة تجار ولا وين حماية المستهلك عنه طالع امريكا استدعوه بالبرلمان وبجوه واحنا ولا جنه صاير شي ... اهي راده على الساير اغلب تجارنا جذيه .

بو ذياب يقول...

المفروض اتصير عندنا ثقافة استهلاكية
نقاطع الطماع عشان يوقف عند حده مو نزيدة ...

Enter-Q8 يقول...

شوف طال عمرك انا اول ما شفت الاعلان من الساير قلت بيتكلم عن فضيحة احسان
لكن الاخ مو صوبها مع انها قبل الفضيحة الحالية بس لاحظت اشلون قاعد يهدد الاخ و يقول ان بيتخذ الاجراءات القانونية


بعيطك معلومة و قديمة بعد
الساير ما يتوب و ما يتعلم من اخطائه بسالفة القضايا
تتذكر التلفون الكاتل الاخ سوى نفس الحركة و اتذكر ان مخازن الجمارك انترست من التلفونات المصادرة حتى اللي جايب ثلاث تلفونات يسحبونها منه، و اخرتها المحكمة سوت فيه مثل ما سوت اللحين
ما يتوب الحلو

فريج سعود يقول...

تصدق في عز الازمة الاقتصادية اغلب الوكالات سووا عروض ونزلوا الاسعار الا الساير زادها

الوكالة الوحيدة الي داخلها زحمة والبياعيين ما يعطونك ويه هذا اذا حصلت لك واحد يجابلك

الشرهة على الناس قاعد يشترون منه جنهم داخلين الجمعية

ZooZ "3grbgr" يقول...

الله يستر على الجميع

ما نبي يبدي تحرك التجارة بعد حادث لا سمح الله

وترى اللي يقوله فريج صج .. قبل فترة شرينا كامري للبيت

يوم ما رحنا لين خلصنا المعامله

جنه المنه علينا

ما عاملنا كعملاء صج الا الكاشير

!!