7‏/9‏/2007

"قــفــشـــات "رمــضــانـــيــة




(1)

بما ان حكومتنا الرشيدة فتحت الباب بحري للأجانب لدخول البلاد بهدف تنمية الأقتصاد ( اقتصاد مين ياعم اذا تجارك اغلبهم فلوسهم بره تبي الاجنبي يستثمر عندك !! ) لذلك لابد لنا ان نرحب بأفواج "المتسوليين" القادمين الى البلاد مستغلين طيبة وسماحة هذا الشعب في هذا الشهر الفضيل , يدخلون اما بكرت زيارة او عبر التسهيلات التي قدمت اخيراً من حكومتنا الرشيدة ويقعد شهر رمضان يلم المقسوم وتوكل على ديرته !! بأم عيني شفت عائلة كاملة عربية لابسين نقابات وعبي ( علشان يكسرون الخاطر اكثر ) ويطرون ام و3 بنات مايمشون ويا بعض لا متفرقين بعد علشان الحصيله تكون اكبر و سبحان الله عيونهم نفس الشيء زرق قلت لوحده من البنات الصغار فيهم بابا فين ؟؟ جان تطلق ساقيها للريح , لا بعد هالأيام هابين هبه مو بس بالسوقه تلقاهم يفترون حتى على الدواوين والبيوت !!


(2)

زحمة رمضان مع زحمة المدارس مع زحمة الدوامات ( العالم حتئطع بعض يا مرسي !! ) الواحد صار وده يشتري قاري بصراحة بس الجو ما يساعد , وللأسف نحن الدولة الوحيدة في العالم التي تسن القوانين لرخصة القيادة من سقف راتب الى نوع الوظيفه الى شهادة ولا تطبقها وتمنح الاستثناءات لكل من هب ودب !! لدرجة انك تجد الحلاق والكواي والغسال والخباز والزبال ايضاً يسوق سيارة !! ما ادري ليش حاطين باصات مواصلات في الديرة اذا كل العمالة عندها سيارات !! يمكن حاطينها للصبي الي عندي علشان ينزل فيها يوم الاحد المرقاب ويتبطح في دوار الشيراتون !! لا ويقولون الديرة ليش زحمه !!
.

(3)

في رمضان تتصفد شياطين الجن ولكن يطلع لنا شياطين الانس الي حالفين ما يتسلطون على العباد الى في رمضان امثال فجر السعيد ومن هم على شاكلتها ويبثون مسلسلاتهم المخزيه والمسيئه لنا ككويتيين وتعطي انطباع خاطيء وسيء لدى الاخرين عن الشعب الكويتي والبيت الكويتي على وجه الخصوص فهؤلاء يصرون على ان يكون البيت الكويتي عبارة عن قصر على شكل فاخر واشرة ذات ثراء فاحش وعائلة مكونة من اب سكير وام مش مضبوطه وبنت بويه واخت دايرة على حل شعرها واخ مدمن لا ويعزم ابوه على قعدات بعد !! واذا حطوا واحد ملتزم خلوه ارهابي !! واذا حطوا وحده منقبه يا شحاته يا بتاعة سحر !! وعلشان تكمل الخلطه يحطون واحد مجنون في كل بيت !! طبعاً ربة الأسرة الفاضله الدراعه الي تلبسها في مشهد ما تلبسها في مشهد ثاني من الفسق !! وهات يا شعب فاصخ الحياء شعب مادي درجه اولى شباب همهم المغازل والسيارات الكشخه والتسكع بالقهاوي !! لا يا عمي احنا مو جذي ومو نفس ما يصورونا هالكتّاب "السكه" الي همهم الربح المادي ومليون "طز" للرسالة الادبيه والاعلامية الهادفة وهات يا مصخره !! احنا اغلبية الشعب عليه قروض وديون والاقساط تاكل نص الراتب !! ومحد قادر يشتري بيت لأن الأسعار مرتفعة والاغلبيه تسكن ايجار هذا اذا ما سكنت في بيت الوالد !! احنا شعب ملتزم وعندنا كرامة ونخوة وشهامة ونغار على اهلنا وبيوتنا واخلاق شبابنا طيبة وفيهم الخير واذا فيه بعض السلبيات فهي قليله جداً ولا تعمم على باقي الشعب الأصيل !!
الله يستر من هالمسلسلات خصوصاً في هذا الشهر لا بعد فجر السعيد فتحت قناة !! لا بالله كدينا خير

.

في ختام القفشات نقلوكم كل عام وانتم بخير
ومبارك عليكم الشهر مقدماً
والله يعينكم على صيامه وعسانا واياكم من عتقاء هذا الشهر الفضيل

هناك 12 تعليقًا:

Aldenya يقول...

بصراحة

برافو عليك

قدرت توصف عدل نمط مسلسلاتنا الكويتية

والمشكلة ان هالسنه الوضع بزوود

:>


ومبارك عليك قرب قدوم الشهر الكريم

وكل سنه وانت طيب

:>

3atreis يقول...

..,


على طاري المستثمر الاجنبي
اذا اهل الديره اتركوها وراحوا ديار برا
ومابقى ديره مااستثمروا فيها وأخيراً سوريا
يمكن هالاجانب يضيفون شي جديدة ينفعنا

.,!

وشغل الطرارة متجرئين حيل
يدخلون بيوتنا بأسامي أم فلان
حتى تظن انها وحده من المعارف


(( إضافة لـ قفشاتك الرمضانية ))

ما أدري ليه في هالشهر الفضيل
يعتقد المواطن العزيز انه هو الوحيد اللي صايم وسهران الليل .!

مايمدي يقعد على مكتبه ولا بأي مكان
إلا وافف وتنفخ واذا أحد كلمه كلمتين
صرخ عليهم
" تراااني صااايم ومالي خلق "

:\

.,

كل عام وانتم بخير
والله يجعلنا من صيامه وقيامه
.

جبل واره يقول...

عزيزتي الدنيا

الله يستر من هالسنه !! والوضع كل ماله يزيد سوء للأسف

ومبارك عليج الشهر
وكل عام وانتي بخير

جبل واره يقول...

عزيزتي عتريس !! :)

المشكلة غيروا عطلتنا وخولها السبت علشان سواد عيون هالمستثمرين الي فلوسهم بره لا واغلب الشركات مفكره تهاجر !!


بخصوص القفشه مالتج اوافقج عليها وبقوه

مادري ليش الناس تنفّس برمضان !! جنه بروحه صايم لا يعني اصيم بضمير ومتأثر !! لا يبا الصيام عباده وتواضع وتسامح مو نفسيه وتتكلم من خشمج !!

كل عام وانتي بخير اختي

Q8DOLL يقول...

بوفهد
صح ماكتبت ياخوي
الطراروه الحين في تخطيط للانتشار وقاعدين ياخذون جوله حتى يرسمون لهم مكان حق الطراره
ويشوفون وين اللي اييب رزق أكثر
لا ويبطون جبدي اللي يطرون معاهم ورقه مادري اشفيها بس حق التحلطم اللي يكون موثق بورقه
حتى طراروتنا ستايل يديد

----------

الزحمه تعور العين والمخ واتعب القلب
ومرات تستغرب من بعض اللي يسوقون شلون هذيل انجحوا باختبار السواقه ؟
مستحيل
والعماله حدث ولا حرج
حتى اللي ما يقدر اييب سياره بروحه تدري شيسوي ؟
مو اهما يشتركون بأجار شقه مثلا
هم يشتركون بأقساط سياره
المهم يكون عندهم سياره
المشكله يبيلها حل
وفي عدة حلول
لكن عمك اصمخ
اصمخ
______
الله عليك
صح لسانك بالنسبه للمسلسلات
لكن في فئه ماذكرتها
لازم هم يحطون فئه الهيلق
واهما الناس الفقاره الانتهازيين والطماعين
والمشفوجين عالفلس
صوره مشوهه
ولا لها اي علاقه بالواقع
الا واقع من كتبها لانه مختلط ببيئه وصخه مثل كتاباته

يعطيك العافيه اخوي
وعساك من عواده

hamdool يقول...

والله إحنا اللي شجعناهم
يسوون هالمسلسلات !! .. ومع
الأسف اللي يتحلطمون
أكثر ناس يتابعونها
ويتناقشون فيها

صارت الشغله الشاذه تربّح
وتزيد دعايات الفواصل بهالمسلسل
أو ذاك .. والتليفزيون شيبي
غير الربح هالأيام
غن كان بالدعايات والإعلانات
أو المسجات

الحمدلله آنا متابع غير جيد
للتليفزيون رغم إني
أشتغل فيه



مبارك عليكم الشهر

عاجـل يقول...

الله يستر كان ممكن اقولها
لو كنت اجهل
لكن الفضايح مكشوفة
واسال عن مسلسل الوزيرة
وعرس الدم
انا اقول

اللهم اني لا اسالك رد القضاء ولكني اسالك اللطف فيه

غير معرف يقول...

بوفهد كا العاده

مبدع


الله يعيطك العافيه


وكل رمضان وانت بخير

جبل واره يقول...

العزيزه \ Q8Doll

اذا كانو فقارى صج احنا ما نقصر وفينا خير بس اكو اللجان الخيرية بالديره على "ئفا" من يشيل ليش ما يروحون يستفيدون منهم اذا كانو مستحقيين !! انا اقصد الفئة اللي التسول عندهم موسمي وما ايون الديرة الا برمضان وغيره من المناسبات هذول كارثة بصراحه والمشكلة الحكومة فاتحتها بحري لهم كل من هب ودب يقدر يدش الديرة البطيخيه


سيارة مشتركة بالاقساط !! والله كلامج عدل واشياء نشوفها بعيونا ولا اكو كواي عنده سيارة يا ربي وهو معاشه ما يتعدى ال70 دينار !!


فئة الهيلق بالمسلسلات هذي كارثه !! مادري هل الكويت عبارة عن طبقتين فقط ؟؟ طبقة ذات ثراء فاحشه ومنحله اخلاقياً واخرى "شحاته" انتهازيه استغلاليه تدور الفلس بأي شكل من الاشكال !!


كل عام وانتي بخير وينعاد عليج ان شاءالله ولا تنسينا بالقرقيعان :)

جبل واره يقول...

عزيزي \ hamdool

كلنا يعلم ان اغلب شركات الانتاج هدفها مادي تجاري بحت واللي ساعدها على هالشي وزراة الاعلام اللي فالحه بس تمنع كتب المؤلفين وتكمم افواهم بدل من تشجيعهم

بما انك بوزارتنا المصونه اسأل عن المنتج المنفذ جم ياخذ على العمل وجم بالحقيقه يكلفه العمل !! وراح تعرف ان الشغله كلها مصخره وانحلال اخلاقي وتكسب غير مشروع !!

مشكور اخوي على التعليق وعساك من عوداه :)

جبل واره يقول...

العزيز \ عاجل

الوزيره !! احنا ما افتكينا من عاليه شعيب وتصرفاتها وافكارها السخيفه هالمره تطلع لنا ممثله !! الفال لفوزيه الدريع !! نشوفها في فلم بطولة مع دريد لحام !!


الكل حاط ايده على قلبه ويقول الله يستر واقول معاك اخوي عاجل اللهم لا نسألك رد القضاء ولكن نسألك اللطف فيه !!

جبل واره يقول...

العزيز القدير \ بوشملان

حضورك يسعدني دائماً

كل عام وانت بخير