13‏/8‏/2007

قـفـشـات صـبـاحـيـة ( جورجيا مين ) ؟؟

بما ان اخي العزيز "بوعبدالله" اطال الله عمره وسدد خطاه وابقاه ذخراً للأمه البلوقيه عامه ولـ واره خاصه تطرق لمشكلة الكهرباء الحالية التي نعيشها حبيت ادلو بدلوي "حلوه ادلو هذي" في هذا الموضوع الكبير والذي اصبح مشكلة تؤرق الشعب وتفسد معيشتهم , من المضحك المبكي ان دولة غنية كـ دولة الكويت ميزانيتها تضاهي ميزانية الدول الكبرى وتعداد سكانها لا يتعدى المليون نسمه تهدد بقطع الكهرباء عنهم وسلخ اجسادهم بـ "القيض" وفي الوقت نفسه تقدم منحه الى جورجيا ( جورجيا مين ) بقيمة 700 مليون المبكي هنا ان هذا المبلغ سوف يستخدم في بناء محطة كهرباء (كهرباء مو محطة وقود ركزوا ) جورجيه !! اما كانت الكويت اوّلى في هذا المبلغ لبنائها هنا ؟؟
على صعيد اخر ذكر معهد الابحاث القومية في بطيخستان الشعبية ان 70% من الشعب الكويتي بدأت تظهر عليه اثارما يسمى بالـ "حوّل المبرمج" ويرجع ذلك يعود الى كثرة "تتنيح" الشعب امام مؤشر الاستهلاك الذي وصل حده !!على طاري المؤشر فيه جملة بالأعلان بصراحة جداً جداً فكاهيه والي صاغها جداً جداً فكاهي الي يقول فيها صاحبنا المصون "اطفى السخان او البلير" !! منو الخبل الي مشغل البلير في هالجو ؟؟ الحراره بره وصلت فوق الـ50 بمراحل وصاحبنا يقول طفوا البلير !! جان بالمره قال "طفوا الدفايات الكهربائية واستخدموا الدوة" من حبنا لها :)

سؤال بريء جداًَ ماله علاقة بموضوع الكهرباء ولكن "يقرقع في قلبي" وابيكم تفكرون معاي فيه
على اي اساس تم اعتماد سعر البرميل بـ 30 دولار عند اقرار الميزانيه العامه للدولة ؟؟ والمعروف لدى الجميع ان السعر تعدى الـ 70 دولار منذ مدة ليست بقصيرة ومازال في ارتفاع مستمر والتقارير الاقتصاديه جميعها تشير الى ان الاسعارستبقى مرتفعة الى ثلاث سنوات قادمة في اقل تقدير !! طيب الـ 40 دولار الزياده الفرق بين العائدات والميزانيه وين راح تروح ؟؟ اكيد جزء كبير منه راح بروح الى "البقرة الحلوب" صندوق التمني الي مقزرها على اليمن والسودان وطقتها ودول مالها داعي ومواقفها مخزيه تجاه الكويت , اخاف باجر نحصل فائض هائل كالعاده وتطلع علينا مشاريع واقتراحات تسبب ازمة بالبلد مثل اسقاط القروض وتوزيع 10 الاف دينار لكل رب اسرة وترد الحكومة تقول عندنا عجز "اكتواري" وتروح الحكومة وتطمطم السالفه بـ "منّه" اميرية عفواً منحة اميرية 200 دينار ويسكتون الشعب والباجي ماندري وين يروح !! ليش مو من الحين يحددون المشاريع التنموية الي يبون يستثمرون الفائض فيها ويفكونا ؟؟
!! يا كثر ما نسأل "ليش" في هالديرة ولا نلقى اجوبه

هناك 24 تعليقًا:

عتيج الصوف يقول...

هاهاهاها سالفة طفوا البيلر بعز الحر
اي والله ناقص يقولون طفوا الدفايات
ضحكوا العالم علينا الكل يتشمت بسبة هالخرابيط حملة و دعايات

Q8DOLL يقول...

اي
جلد الجورجيين ما يتحمل وي عليه
واحنا بالطقاق
يتبدل جلدنا كل صيف من الانصلاخ وبوزليقة
والله خوش دلو يا بوفهد
وتستمر عين عذاري بالتبرعات

Q8DOLL يقول...

على فكره اللي اعرفه ان جورجيا بلاد باااارده جدا

بو فهد يقول...

عتيج الصوف

حل الازمة سهل جداً وبسيط ومايكلف مثل ما تكلف حملة الترشيد التافهه
الحل الله يسلمك ان حكومتنا الرشيدة توزع "مواطير" روبن 5000 شمعه على كل بيت كويتي يدقون هندله وقت الذروه وكان الله غفوراً رحيما :)

بو فهد يقول...

q8doll

جورجيا بالصيف درجه حرارتهم 15 درجة مئويه بالكثير وهذا من مصدر موثوق به جداً قام بالزياره لهذه الجمهوريه الباردة , لدرجة ان الشعب هناك "يلكه" 24 ساعه علشان يدفى !!
دام جذي نعطيهم مصنع الفحم المكلسن ويتنازلون عن المحطه لنا !! خوش صفقه :)





اي والله اخرتنا بنصير "زواحف" كل شوي نبدل جلودنا على حسب الطقس !!




لا ويقولج كل شي فكرته فيه الحكومه وراح يحطون "كنديشنات" (مكيفات) بالشوراع وراح يعلقونها بالشبات علشان تبرد حراره الجو !!

2 u ALL يقول...

صم "رجباً" ترى عجباً

بو حامد يقول...

مو خبرك احنا دوله صغيره ، ولازم ندفع عشان يكون لنا دعم دولي .

طيب ادفع حق ناس اوادم

جورجيا ميين ؟

و700 مليون حق شحقه ، حق ليش ؟

kuwaitya_7saweya يقول...

الصراحه دلوك اللي ادلوته عجبني
وبعطيك العافيه على الدلو
جد والله وين صايره جورجيا
و 700 مليووووووووون ليش
واحنا اشفينا
مانبي 700 مليون
بس 100 مليون ولا 500 مليون
والله قاصين علينا
واحنا مصدقينهم
------------------
اما سالفة الحمله الاعلانيه
والله جد مسخره
روح المجمعات شوف البنات والصبيان ملوت الحمله يفشلون
يهال وقز واشياء تافهه
وغير اللي يدقون والمغازل والضحك
وعلى طاري البيلر ماتدري يمكن في ناس بردانين ماتدري يمكن
-------------------------
مو اقولك احنا مساكين وكله قاصين علينا عيل 40 الف وين تروح
جان زين بس اليمن والسودان
مصر والعراق وسوريا
وغيرهم
وجان زين يبين بعينهم
صج لا حمدا ولا شكورا
عومه ماكوله ومذمومه
وعلى قولتهم لحم كتافهم من خير الكويت
والله قهرررررررررر والله
ويعطونا 200 والله لو مايعطونا احسن
ولامنتهم
-------------------------------
ويعطيك العافيه واسفه طولت
الظاهر دلوي متروس
ومشكور
وطوف البدليات اذا فيه

بو فهد يقول...

2 u ALL

هذا المثل قديم .. بالكويت لازم نطوره علشان نلحق بركب التطور والتنميه لذلك سوف يصبح


( اشعل النيران واطف السخان )


<< مواطن كويتي متأثر من حملة الترشيد

بو فهد يقول...

بوحامد تعبنا واحنا ندفع !!

يعني امريكا بريطانيا روسيا ما يخالف ندفعلهم مع ان المفروض ما ندفع لأنه اكو معاهده حماية !! يعني ماله داعي دهان سير اكثر خلاص الي اندفع وايد والكويت اولى بهالبيزات الي "تتفسفس" يميناًَ ويساراً

بو فهد يقول...
أزال المؤلف هذا التعليق.
بو فهد يقول...

كويتيه حساويه

مبين عليج "قلبج متروسه" والله !! لا ودلوج طلع اكبر من دلوي بعد الظاهر طلبيه !!

لو عندنا هلـ700 مليون جان بنينا محطه حلوه يديده تلغي مؤشر "الحوّل" الي اذونا فيه لا بعد بالبيزات الزايده نسوي جسر الصبيه الي صارله سنتين نسمع فيه ومانشوفه !! والله لو بانين ناطحة سحاب ببنيد القار جان خلصت !!


حملة الترشيد هذي سلطة الله يسلمج لو موفرين فلوسها وموزعين بدالها "مواطير" على الشعب جان وايد ابرك
وبعدين منو بيبرد بهالجو بالله عليج !! لو تاخذين بيضه من اي صندوق بيض بالجمعيه بس بشرط يكون كويتي مو هندي ( علشان دعم المنتجات الوطنيه ) وتحطينه بالشمس بره خمس دقايق وتردين له مره ثانيه راح تلقينه بقدرة قادر فقس كتكوت !!


40 الف يا حساويه !! كسرتي خاطري بصراحه لما قريتها :(

بعدلج المبلغ وعلشج الحساب
دولار على البرميل 40
نقول مجازاً الكويت تنتج مليون مع انها تنتج اكثر من 2,5 بس انا ابي مليون

نقول 40 ضرب 1000000
يساوي 40000000

وايد مو ؟؟ بس شلون لو اقولج ان هذا بس باليوم !! يعني ضربي هالمبلغ بـ 366 !!

بصراحه انا ناتج المعادله الاولى ما اعرف انطقه لأن بالمدرسه عطونا الى 6 اصفار بس !! يعني شدي حيلج واجتهدي وعطينا الناتج

بس ماعليه الله كريم ان شاءالله هالسنه نسمع خبر زين والله ما نبي هالـ200 دينار وخل يعطون الي يبون ان شاءالله اسرائيل ما يخالف بس خل يسنعونا شوي ويجابلون الديرة ويطورونها اول نضحك على العالم والحين الكل يضحك علينا وعلى التخلف الي احنا فيه !!


مشكوره حساويه على "الدلو" الجميل واسمحيلي اخذ صورة تذكاريه معاه :)

kila ma6goog يقول...

booooog

booog

is the answer to all ur questions

ابو شملان يقول...

اما سالفة جورجيا

هذى

صج صج تخلي الشعب يطلع من طوره

الحين ازمه كهربا وشادين حيلهم

وتروح الحكومه تعطي جورجيا 700مليون

حق شنو .....الكهرباء

صج ديرة بطيخ

بو فهد يقول...

kila ma6goog

البوق اعتبرها كلمة شوي صغيرة مقارنة بلي قاعد يصير


يعني دور كلمه مثل "لهط" او "زلط" شي جذي اكبر من البوق وعلى عينك يا مواطن لأن البوق على اقل تقدير يتم في السر مش في العلانيه بس الي قاعدين نشوفه الحين اشكره !!

صديق البلوق الدائم مشكور عىل التواصل :)

بو فهد يقول...

ابو شملان

لو معطين جورجيا الصديقة ( عاجبتني صديقه ) 700 مليون حق انشاء مصنع كتشب او مايونيز ما يخالف .. بس انشاء محطة كهرباء !! كبيره حيل في حقك يا شعب :)

الديرة مش بطيخ عمي بوشملان الديرة "سلطة" على "مرقة باميا" يعني مو شي

3atreis يقول...

.,’
\

آه ياجورجيا .!

الفلوس وطلعت ماعندي كلام
والسبب كهربتهم وهم ماعندي كلاام .,

دايم .. خير ديرتنا لبرا
لكن عسى يبين فيهم .,!
في هاللي نزططهم


.,


أما قصة لييش وسؤال يقرقع .,
فهذا السؤال كان يقرقع في قلبي نفسك
حتى باتت قرقعته
يسمعها القاصي و الداني


عاد قرقعتي ابتدت معاي بعمر مبكر حيييل
اذا تبي تضحك اسمعها .. شر البلية مايضحك .,‘

من يومي بالابتداائي وانا خايفة ومتخرعة .!
انه بيجينا يوم وماكو نفط ..
وانه البلد بتتوقف فيه الحياة
وبيرجع فينا الوقت لألف سنه ورا هههه

مزعجينا انه النفط طاقه غير متجددة
وشوفوا لكم مصدر ثاني تعتمدون عليه .,!

والصحيح انهم مكتشفين أماكن جديدة
فيها خييير من ربي

..,

هذا عن قرقعت طفولتي بس .,!
لكن شو بدنا نحكي .!


.,’

تحياتي لك بوفهد

.

حمد يقول...

http://www.nationalkuwait.com/vb/showthread.php?t=14027

حسام بن ضرار يقول...

انا اعتقد ان ترشيد اثبتوا وجوههم العريضه و زغالتهم مع الجمهور بعد خبر جورجيا هذا


و للحين لهم ويه يلغون على روس الاوادم؟


قال ترشيد




كلها مصالح و بزنس اعلامي لا اكثر ولا اقل

بو فهد يقول...

عتريس

ياعزيزتي كثرة "قرقعة" الأسئلة بالقلوب اليومين دول !!

تصدقين نفس "القرقعه" الي كنتي "تقرقعينها" وانتي صغيره كنت "اقرقعها" وانا صغير !!
(قلبتها قرقيعان )


تذكرت الارهاب الفكري اللي يمارسه المدرسين الوافدين ايام الأبتدائية وماعندهم الا جمله "ان النفط طاقه غير متجدده وان راح يخلص واننا راح نرجع للغوص والرعي" !! بس شنقول غير الله كريم والله يعينكم يا الأجيال القادمه اذا لقيتوا شي بصندوقكم الي راح تاكله الارضه قابلوني !!

عتريس شكراً على "القرقعه" المفيده

بو فهد يقول...

حمد مقال جميل :)

وكاسك يا وطن !!

بو فهد يقول...

حسام بن ضرار

المصيبه ان ميزانيه الحمله ملايين الملايين !! لو موفرينها بشي ثاني مو احسن ؟؟
بدال ما "ننحوّل" واحنا نطالع المؤشر !!

حلم جميل بوطن أفضل يقول...

This comment has been removed because it linked to malicious content. Learn more.

بو فهد يقول...

حلم جميل

شكراً على المرور وعلى الأضافة

كاسك يا وطن !!