لا تسلّم نفسك يابوفهد‏

هزُلت يا ابوفهد...

هزُلت حتى بدا من هزالها... كِلاها، وحتى سامها كل مفلسِ

هالدولة مادري شلون صايرة، ما تطلّع قوتها إلّا على المواطنين والشيوخ؟!!

الشيخ أحمد الفهد مطلوب للمثول أمام النيابة واحتمال يصدر عليه ضبط واحضار!!

ما صدر عليك ضبط واحضار في مئات الملايين مالت هاليبرتون، يصدر عليك في قضية تافهة تخص جاسم الخرافي؟!!

انت بعد الله يهديك تجاوزت الخطوط الحمراء ولّا فيه احد عاقل بالكويت يتعرّض لجاسم الخرافي والتجّار؟

شوفهم لاعبين بحسبة الدولة لعب ومحّد يحيلهم النيابة!!

غسيل أموال وشراء ذمم ومناقصات مشبوهة وأغذية فاسدة واحتكار واستيلاء على أملاك واموال الدولة وأعمال مخالفة للقانون، ومع هذا ما شفنا أي تاجر انسجن أو تحوّل للنيابة!

لكن شرّ هالدولة على المواطن اللي عسى ما يقول رأيه في شيء من الأمور إلّا ويوكنات أمن الدولة السوداء تحوس حول بيته! وتعال عاد شوف القضايا.. تقويض النظام العام للدولة ومس الذات الأميرية وترويج الإشاعات التي تهدد المجتمع!

ويوم خلصوا من الشعب أشوف حوّلوا على شيوخنا!

لكن هيهات نسكت على شيوخنا " اللي همّ نن عنينا"، هم صحيح بالنهاية يطلعون براءة " تيز ميز" مثل شيخ الناقلات  أو ما ينسجنون مثل شيخ جريدة الشاهد المشهور بشيخ الشبرة، لكن ما نقبل شيوخنا يتبهذلون بإسم القانون والعدالة!

أكثر شيء يغث بالموضوع هو ان الشيوخ اللي أسّسوا القانون والقضاء تتم ملاحقتهم الآن بإسم القانون والقضاء!!

خربت الكويت يا ناس، عقب ما كان الشيخ يسدح المواطن بالشارع ويجلده بالخيازرين، صار الشيخ الحين مطلوب للعدالة وينزل عليه ضبط واحضار!

ماني متخيّل ان الشيخ أحمد الفهد يمثل أمام وكيل النيابة!

ماودي يهينون الشيخ أحمد خلال اجراءات التحقيق، ولّا البراءة مضمونة في الجيب، لأن ابو فهد ذيب ويفك نفسه مثل ما فك نفسه من قضية هالبيرتون.

يابوفهد خذها مني... لا تروح لهم ولا ترد عليهم، اشتسوى عليك اذا طلع وكيل النيابة من عامة هالشعب....بيسري أو خضيري أو بدوي؟!

ما نقبلها عليك يقعد وكيل النيابة يشخّطك بالأسئلة ويضيّق عليك مثل ما سووا فيك تجّار التحالف الوطني في الجلسة المشهورة، الله لا يعيدها عليك ولا على أي شيخ.

اللي يعرفونك يقولون انك شجاع لكن الشجاعة ما تفيد في التحقيقات وخصوصا في هذي القضية بالتحديد، ومو حلوة شيخ ابن شيخ ابن شيخ يقعد كل ما سأله وكيل النيابة سؤال يرد: لا والله مو انا, ما قلت، ماعرف شي، مالي شغل، مافيش كاسيت، مظلوم يا بيه!

هذا التحقيق مثل الموس في البلعوم يا بوفهد، اذا قلت الحقيقة بتزعّل التجّار وشيبانك، واذا أنكرت بتزعّل الله والشعب والنزاهة والمرجلة.

لا تروح لهم ترى بيحسّنون شعرك، وانت عاد من تالي فاضي شغل حتى سعود بوحمد مو عندك عشان توسع صدرك عليه، وما عاد عندك إلّا شعرك مرّة تسويه عجايف ومرّة تسويه عناقيص ومرة فالّه مثل المصارع القديم "سنوكا"!

ترى بيحسّنونك ع الصفر مثلك مثل الطاحوس والنملان والصواغ، شيفكك حزتها من مرزوق الغانم وعادل الصرعاوي وفجر السعيد اللي بيقزّرونها عليك: أقرع مقيرع طاح بالطاسة؟!

وأهم شي لا تروح لهم يوم الخميس، ترى بيسوون فيك نفس الحركة اللي يسوونها بالمواطنين، يستدعونهم يوم الخميس عشان يحبسونهم الجمعة والسبت!

شوري عليك اذا تبي يهوّنون عنك...تروح لجاسم الخرافي أو العم جاسم الخرافي مثل ما كنت تسمّيه أيام ما كنتوا سمن على عسل، وتطيح على راسه وتبوس خشمه وتطلبه السماح.

مثل مانت شايف يابوفهد، بعد ما كانت قبضتك في قبضته أصبحت أنت والدولة كلها في قبضته!